ઝી મ્યુઝિક ગુજરાતી પર ઇશાની દવેનું ‘ઘોર અંધારી’ રિલીઝ

જાણીતી ગાયિકા ઇશાની દવેના અવાજમાં રજૂ થયેલું ભક્તિમય ગીત ‘ઘોર અંધારી’  અંબે માતાની દિવ્ય શક્તિ, ગુજરાતની લોકસંસ્કૃતિ અને નવરાત્રિના ઉત્સાહને એકસાથે વણી લે છે.

નવરાત્રિના તહેવારને હવે ગણતરીના દિવસો જ બાકી છે, ત્યારે ઝી મ્યુઝિક કંપનીનું સ્પેશિયલ ગુજરાતી મ્યુઝિક પ્લેટફોર્મ-  ઝી મ્યુઝિક ગુજરાતી એક ખૂબ જ સુંદર ગરબા સોન્ગ ‘ઘોર અંધારી’ લઈને આવ્યું છે. આ ગીત મૌલિક મહેતાએ કમ્પોઝ કર્યું છે અને તેના શબ્દો પ્રતિક આહીરે લખ્યા છે. અંબે માતાની ભક્તિમાં વણાયેલું આ ગીત ગુજરાતી લોકસંગીતની મીઠાશ, ગરબાના તાલ અને ઇશાની દવેના પાવરફુલ અવાજનું અદ્ભુત મિશ્રણ છે.

ગીત વિશે વાત કરતા ઇશાની દવેએ જણાવ્યું કે, “નવરાત્રિ મારા માટે માત્ર એક તહેવાર નથી, પણ તે મારી શ્રદ્ધા અને મારા ઉછેરનો એક હિસ્સો છે. ‘ઘોર અંધારી’ એ અંબે માતાના ચરણોમાં મારી એક વિનમ્ર ભેટ છે. પેઢીઓથી ચાલ્યા આવતા ગરબા, પરંપરા અને ભક્તિભાવમાંથી જ આ ગીતનો જન્મ થયો છે. આ ગીત દ્વારા અમે અમારી સાંસ્કૃતિક પરંપરાને આજના યુવાનો સુધી એક નવા અને તાજા સંગીત સાથે પહોંચાડવા માગતા હતા, જેથી આપણા પરંપરાગત ગરબાનો આત્મા પણ જળવાઈ રહે. મને આશા છે કે જ્યારે પણ શ્રોતાઓ આ ગીત સાંભળશે, ત્યારે તેઓ મા અંબેની ભક્તિ, ગરબાનો આનંદ અને આપણા વારસા સાથેનો એ સુંદર જોડાણ ચોક્કસ અનુભવશે.”

મ્યુઝિક કમ્પોઝર મૌલિક મહેતાએ ઉમેર્યું કે, “‘ઘોર અંધારી’ પર કામ કરવાનો મુખ્ય હેતુ ગરબાની આધ્યાત્મિક ઊર્જાને એક નવા અને તાજા સંગીત સાથે રજૂ કરવાનો હતો. ઇશાનીના અવાજે આ ગીતમાં એક અલગ જ ભાવ અને જીવંતતા ઉમેરી છે. અમે એક એવું ગીત બનાવવા માગતા હતા જે જૂની અને નવી બંને પેઢીના લોકોને સ્પર્શી જાય.”

ઝી મ્યુઝિક કંપનીના ચીફ બિઝનેસ ઓફિસર સુજલ પારેખે જણાવ્યું કે, “દરેક ગુજરાતી માટે નવરાત્રિ માત્ર તહેવાર નથી પણ એક લાગણી છે, અને ગરબા એ આ ઉત્સવનું હૃદય છે. ‘ઘોર અંધારી’ સોન્ગ દ્વારા અમે ભક્તિ, પરંપરા અને ગરબાનો ઉત્સાહ એકસાથે લાવવાનો પ્રયાસ કર્યો છે, જેથી લોકો નવરાત્રિમાં આ ગીત પર ઝૂમી શકે અને ગાઈ શકે. ઇશાનીના મધુર અવાજે ગીતને વધુ સુંદર બનાવ્યું છે. અમને આશા છે કે ગુજરાતમાં જ નહીં પણ વિશ્વભરમાં વસતા ગુજરાતીઓના નવરાત્રિ ગરબામાં આ ગીત ચોક્કસ ગુંજશે.”

શ્રદ્ધા, આશા અને ભક્તિથી સભર આ ગીત નવરાત્રિના આધ્યાત્મિક મહત્વની સાથે સાથે ગરબાના આનંદને પણ રજૂ કરે છે. મા અંબે પર ભક્તોની જે અપાર શ્રદ્ધા છે, તેને આ ગીતમાં સંગીતના માધ્યમથી ખૂબ જ સરસ રીતે વણી લેવામાં આવી છે. આ ગીત ટ્રેડિશનલ ગરબાના શોખીનો અને આજના યુવાનો બંનેને એકસરખું પસંદ પડે તેવું છે.

નવરાત્રિના ઉત્સવના માહોલ વચ્ચે રિલીઝ થયેલું આ ગીત ઝી મ્યુઝિક કંપનીના પ્રાદેશિક સંગીતના પ્રયાસોને વધુ મજબૂત બનાવે છે.

ગુજરાતના પ્રખ્યાત ગાયક પ્રફુલ દવેની દીકરી ઇશાની દવે આજે ગુજરાતી મ્યુઝિક ઇન્ડસ્ટ્રીનો એક જાણીતો અવાજ બની ચૂક્યા છે. પોતાના પિતાનો સંગીતનો વારસો આગળ ધપાવતા ઇશાની પરંપરાગત સંગીતને આજના યુગ સાથે ખૂબ જ સરસ રીતે જોડે છે. ‘ઘોર અંધારી’ સોન્ગ દ્વારા તેઓ ફરી એકવાર પોતાની સાંસ્કૃતિક પરંપરા અને ભક્તિમય શૈલી લઈને ઝી મ્યુઝિક ગુજરાતીના માધ્યમથી શ્રોતાઓ સમક્ષ આવ્યા છે.

‘ઘોર અંધારી’ સોન્ગ સાથે ઝી મ્યુઝિક કંપની વિવિધ ભાષાઓના સંગીત ક્ષેત્રે પોતાની પકડ વધુ મજબૂત કરી રહી છે અને ગુજરાતી લોકસંગીત તથા ભક્તિસંગીતને દેશ-વિદેશના શ્રોતાઓ સુધી પહોંચાડી રહી છે. ઝી મ્યુઝિક ગુજરાતીના માધ્યમથી કંપની ગુજરાતી કલાકારો અને અહીંની સંસ્કૃતિને એક મોટું પ્લેટફોર્મ પૂરું પાડી રહી છે.

આગામી નવરાત્રિના ઉત્સવને વધુ રંગીન બનાવવા માટે આ ગીત એક શ્રેષ્ઠ ભેટ બની રહેશે.

‘ઘોર અંધારી’ સોન્ગ ‘ઝી મ્યુઝિક ગુજરાતી’ પર રિલીઝ થઈ ચૂક્યું છે અને તમામ જાણીતા મ્યુઝિક સ્ટ્રીમિંગ પ્લેટફોર્મ્સ પર સાંભળવા માટે ઉપલબ્ધ છે.