મુંબઈના જાણીતા પ્રોડક્શન હાઉસ ‘સીન ટુ સીન સ્ટુડિયોઝ’ની પ્રથમ ગુજરાતી ફિલ્મ “બેચલર ડેડી” નું ટાઇટલ અનાવરણ

• 3S મુવીઝ પ્રેઝન્ટ્સ | પ્રોડ્યુસ્ડ બાય સીન ટુ સીન સ્ટુડિયોઝ

Ahmedabad – મરાઠી અને હિન્દી ફિલ્મોમાં અનેક સફળ પ્રોજેક્ટ્સ આપ્યા બાદ, મુંબઈ સ્થિત પ્રખ્યાત પ્રોડક્શન હાઉસ ‘સીન ટુ સીન સ્ટુડિયોઝ’ (Scene to Scene Studios / 3S Movies) એ ગુજરાતી ચલચિત્ર જગતમાં ધમાકેદાર એન્ટ્રી કરી છે. ‘3S મુવીઝ’ પ્રેઝન્ટ્સ અને ‘સીન ટુ સીન સ્ટુડિયોઝ’ ના બેનર હેઠળ એકસાથે બે ગુજરાતી ફિલ્મો બનાવવાનું આયોજન કરવામાં આવ્યું છે. તેમની પ્રથમ ફિલ્મ “બેચલર ડેડી” (Bachelor Daddy) નું ભવ્ય ટાઇટલ અનાવરણ અમદાવાદની પ્રાઇડ પ્લાઝા હોટેલ ખાતે સફળતાપૂર્વક પૂર્ણ થયું છે.

આ ભવ્ય પ્રસંગે ફિલ્મના નિર્માતા સંજના વિનોદ તાંબે અને આશુતોષ વિનોદ તાંબે, સહ-નિર્માતા હિતેશ બેલદાર અને ઉમેશ હરિશ્ચંદ્ર તાંબે, તથા નિર્દેશક શાંતનુ અનંત તાંબે ખાસ ઉપસ્થિત રહ્યા હતા અને મીડિયા સાથે સંવાદ સાધ્યો હતો.

“બેચલર ડેડી” એક સંપૂર્ણ પારિવારિક કોમેડી ડ્રામા (Family Drama) ફિલ્મ છે, જે દર્શકોને ખડખડાટ હસાવવાની સાથે એક સુંદર મનોરંજન પૂરું પાડશે. આ ટાઇટલ અનાવરણ કાર્યક્રમમાં ફિલ્મના તમામ મુખ્ય કલાકારોએ પણ ખાસ હાજરી આપી હતી. ફિલ્મના લીડ હીરો તરીકે જાણીતા અભિનેતા ગૌરવ પાસવાલા અને પ્રેમ ગઢવી, તેમજ મુખ્ય અભિનેત્રીઓ કથા પટેલ અને પ્રિનલ ઓબેરોય આ ઇવેન્ટમાં ઉપસ્થિત રહ્યા હતા. તેમની સાથે ફિલ્મમાં મહત્વની ભૂમિકા ભજવી રહેલા અન્ય જાણીતા કલાકારો નિસર્ગ ત્રિવેદી, જસ્સી દાદી, દીપા ત્રિવેદી અને કોમલ પંચાલ પણ આ કાર્યક્રમમાં ખાસ હાજર રહ્યા હતા અને ફિલ્મ અંગે પોતાનો ઉત્સાહ વ્યક્ત કર્યો હતો.

ફિલ્મની ટેક્નિકલ ટીમે પણ આ ઇવેન્ટમાં હાજરી આપી હતી. ફિલ્મનું મધુર સંગીત અમિત બારોટ દ્વારા તૈયાર કરવામાં આવી રહ્યું છે. ફિલ્મના એડિટર હિરેન ચિત્રોડા, કોસ્ચ્યુમ ડિઝાઇનર અમીલ મેકવાન અને લાઇન પ્રોડ્યુસર દીપેન ગોહિલ છે.

આગામી દિવસોમાં આ ફિલ્મનું શૂટિંગ ગુજરાત પૂરતું સીમિત ન રહેતા અમદાવાદ, રાજસ્થાન અને છેક લંડન ખાતે કરવામાં આવશે. આ ફિલ્મ માત્ર ગુજરાત કે મુંબઈમાં જ નહીં, પરંતુ ભારતના અન્ય રાજ્યો તેમજ વિદેશોમાં (Overseas) પણ ગ્રાન્ડ લેવલ પર રિલીઝ કરવામાં આવશે, જેથી વિશ્વભરમાં વસતા ગુજરાતીઓ આ શાનદાર કોમેડી ફિલ્મની મજા માણી શકે. મીડિયા અને ઉપસ્થિત મહેમાનો તરફથી આ ઇવેન્ટને ખૂબ જ સારો પ્રતિસાદ મળ્યો હતો.