ભારતગેસે ગુણવત્તાની ખાતરી આપી, ‘ઝીરો કા દમ – ખામી જણાય તો મફત રિફિલ’

ભારત પેટ્રોલિયમ કોર્પોરેશન લિમિટેડ (બીપીસીએલ), જે ફોર્ચ્યુન ગ્લોબલ 500 કંપનીઓમાં સ્થાન ધરાવે છે અને મહારત્ન જાહેર ક્ષેત્રનું ઉપક્રમ છે, તેણે એલપીજી સિલિન્ડરની ગુણવત્તા અને ગ્રાહકોની સુરક્ષાને વધુ બહેતર બનાવવા માટે ‘ઝીરો કા દમ’ (ZKD) કાર્યક્રમ શરૂ કર્યો છે. આ કાર્યક્રમ બીપીસીએલના સમગ્ર LPG નેટવર્કમાં અમલમાં મૂકવામાં આવી રહ્યો છે. તેનો ઉદ્દેશ્ય સિલિન્ડરની ગુણવત્તા સુનિશ્ચિત કરવાનો અને ગ્રાહકો સુધી સુરક્ષિત સિલિન્ડર પહોંચાડવાનો છે.

‘ખામી જણાય તો મફત રિફિલ’ પહેલ હેઠળ અમદાવાદ શહેરના ભારતગેસના ગ્રાહકોને વિશેષ ખાતરી આપવામાં આવી રહી છે. આ મુજબ, જો સિલિન્ડરની ડિલિવરી સમયે તેમાં કોઈ વાસ્તવિક ખામી જણાય, તો ગ્રાહકને લાગુ નિયમો અને શરતો અનુસાર મફત રિફિલ આપવામાં આવશે.

‘ઝીરો કા દમ’ કાર્યક્રમનો ઉદ્દેશ્ય એ સુનિશ્ચિત કરવાનો છે કે સિલિન્ડર ગ્રાહકના ઘર સુધી પહોંચે તે પહેલાં જ ગુણવત્તાના દરેક માપદંડ પર ખરો ઉતરે. આ અંતર્ગત બીપીસીએલના એલપીજી  બોટલિંગ પ્લાન્ટનું સ્વતંત્ર એજન્સીઓ દ્વારા સઘન નિરીક્ષણ અને ઓડિટ કરવામાં આવે છે. આ એજન્સીઓ નેશનલ એક્રેડિટેશન બોર્ડ ફોર સર્ટિફિકેશન બોડીઝ (NABCB) દ્વારા માન્યતા પ્રાપ્ત છે.

આ નિરીક્ષણમાં પ્લાન્ટથી લઈને ગ્રાહક સુધી સિલિન્ડર પહોંચાડવાની સમગ્ર પ્રક્રિયાની ચકાસણી કરવામાં આવે છે, જેથી ગ્રાહકો સુધી માત્ર ઉચ્ચ ગુણવત્તાવાળા અને ખામીરહિત સિલિન્ડર જ પહોંચે. અત્યાર સુધીમાં BPCLના 55 LPG બોટલિંગ પ્લાન્ટ્સ ‘ઝીરો કા દમ’ પ્રમાણપત્ર પ્રાપ્ત કરી ચૂક્યા છે.

આ પહેલ અંગે BPCLના LPG બિઝનેસ હેડ શ્રી ટી.વી. પાંડિયને જણાવ્યું હતું કે,

“‘ઝીરો કા દમ’ કાર્યક્રમ ગુણવત્તા, શ્રેષ્ઠ કામગીરી અને ગ્રાહકોની સુરક્ષા પ્રત્યેની બીપીસીએલની પ્રતિબદ્ધતા દર્શાવે છે. સઘન ગુણવત્તા ચકાસણી, નિયમિત જાળવણી, સુરક્ષા તપાસ અને સ્વતંત્ર એજન્સીઓના પ્રમાણન દ્વારા અમે બોટલિંગ પ્લાન્ટથી લઈને ગ્રાહકના ઘર સુધી દરેક સ્તરે ગુણવત્તા સુનિશ્ચિત કરી રહ્યા છીએ.

‘ખામી જણાય તો મફત રિફિલ’ની ખાતરી અમારા સિલિન્ડરની ગુણવત્તા પ્રત્યેના અમારા વિશ્વાસને દર્શાવે છે. આ પહેલ ગ્રાહકોને પ્રાથમિકતા આપવાની અમારી વિચારધારાને પણ વધુ મજબૂત બનાવે છે. અમારા એલપીજી  બિઝનેસ યુનિટના સતત પ્રયાસોનો ઉદ્દેશ્ય ગ્રાહકો સુધી કોઈપણ ખામી વગરના સિલિન્ડર પહોંચાડવાનો અને તેમનો વિશ્વાસ વધારવાનો છે.”

આ કાર્યક્રમમાં આધુનિક ટેક્નોલોજી, નિયમિત જાળવણી, સઘન સુરક્ષા તપાસ અને સ્વતંત્ર એજન્સીઓ દ્વારા ગુણવત્તા પ્રમાણનનો સમાવેશ કરવામાં આવ્યો છે. તેના માધ્યમથી LPG બોટલિંગની સમગ્ર પ્રક્રિયા પર નજર રાખવામાં આવે છે અને ગુણવત્તાના નિર્ધારિત માપદંડોનું પાલન સુનિશ્ચિત કરવામાં આવે છે. આ સમગ્ર વ્યવસ્થામાં ગ્રાહકોની સુરક્ષાને સર્વોચ્ચ પ્રાથમિકતા આપવામાં આવી છે.

‘ઝીરો કા દમ’ હેઠળ ગ્રાહકોને આપવામાં આવેલી મફત રિફિલની ખાતરી આ જ પ્રતિબદ્ધતાને વાસ્તવિક સ્વરૂપ આપવાનો પ્રયાસ છે. ડિલિવરી સમયે સિલિન્ડરમાં વાસ્તવિક ખામી જણાય તો મફત રિફિલની સુવિધા આપીને ભારતગેસે ગુણવત્તા અને વિશ્વાસ પ્રત્યેની પોતાની પ્રતિબદ્ધતાનું પુનરાવર્તન કર્યું છે.

આ પહેલની શરૂઆત 14 પસંદગીના શહેરોમાં કરવામાં આવી હતી. હવે તેમાં અમદાવાદ સહિત વધુ 22 શહેરોનો સમાવેશ કરવામાં આવ્યો છે. ધીમે ધીમે આ પહેલ અન્ય શહેરોમાં પણ શરૂ કરવામાં આવશે.

ઝીરો ડિફેક્ટ. શ્રેષ્ઠ અનુભવ.